كتبت أماني شحادة تنعي والدها الشهيد إبراهيم شحادة على حسابها الرسمي على موقع فيسبوك:

بابا حبيبي شهيد، هلأ محمد أخويا بيستقبله بكل فرحة وبنبسطه على قد ما اشتاقله

الدنيا كسرتنا أنا وماما وخواتي بمحمد وهلأ في بابا.. ظهري مكسور، حمل الدنيا كلها فوق جسمي وأنا من جوا فارغة من بعدكم
بحبكم وهنلتقي قريب يا حبايبي بعرف مش هتتركونا بنات هيك.

وكتبت أيضًا:

"إنا لله وإنا إليه راجعون"، 1/11/2024

استشهدت يا سندنا بعد سبعة شهور يا بابا يا حبيبي من استشهاد محمد أخويا وأنت بتحضن صورته كل ليلة وبتحطها على قلبك وبتغمض عيونك وبتقرأ القرآن.. طلبك محمد ومقدرش يعيش مدونك بالجنة ونعيمها..

احنا بناتك اللي بتفتخر فينا على طول هينا منحاول نكون قويات مثل ما وصيتنا رغم عدم تصديقنا لفقدانك ومش هنستوعب..

احنا بناتك اللي بتفتخر فيهن عطول وبتسندنا بكل خطوة علمتنا القوة بس ولا مرة قسيت علينا، حنيت علينا أنا وخواتي حنية لو كل العالم اجتمع ما رح نشوف جزء منها، اليوم فهمنا ليش بتضل طول الوقت تقوينا ع الحياة عشان غيابك المفاجئ يلي هد حيلنا مرة وحدة

ترجيت ربنا ما نفقدك وتبعد عنا مشان بنات وتضل تاج راسنا وحياتنا، بس للقضاء والقدر رأي ثاني، لله نحن وما نحب..

بحبك، مفيش قدرة للحكي والله ولا عارفة شو أكتبلك، أنت الأب اللي مش ممكن أشوف رجال زيه بالدنيا، ربي يرحمك ويصبرنا ويجمعنا فيك أنت ومحمد بجنة النعيم مع الأنبياء والشهداء والصديقين

مع السلامة يا سيد الرجال، مع السلامة يا حنية الدنيا وقوتها وعمودها

#الشهيد_إبراهيم_شحادة

كما كتبت شمس شحادة -ابنة الشهيد- على حسابها الشخصي على موقع فيسبوك:

"وَبَشِّرِ الصَّابِرِينَ الَّذِينَ إِذَا أَصَابَتْهُمْ مُصِيبَةٌ قَالُوا إِنَّا لِلَّهِ وَإِنَّا إِلَيْهِ رَاجِعُونَ"

بقلوب عامرة بالإيمان بقضاء الله وقدره أُنعي استشهاد بابا العقيد "إبراهيم شحادة" الذي استشهد يوم الجمعة 1-11-2024 مُلتحقاً بأخي الشهيد "محمد إبراهيم شحادة"

تعجز الكلمات عن رثائك يا بطلي، إلى روحٍ وريحانٍ وجنةُ نعيم يا ضحكة عمري أنتو، حبيبي يا بابا الله يسهل عليكم ,ما هتجمعنا الصور والضحكات تاني يا قلبي، سبقتني لجنات النعيم ولعند شبيهي ولي العهد محمد يا بابا،

أستاذي وروحي وقدوتي ومثلي الأعلى بالدنيا أنت ورفيق السهرات كل يوم، طول عمري بتغنى فيك وبتربايتك، الله يسهل عليك يا بابا، هضل أعمل بكل شي علمتني إياه ووصتيني عليه، كنت تدعمني وتفتخر فيي بكل خطوة يا روحي، ربنا يجعلني أول من يلتحق بك من أهلك يا بابا يا قلبي، وألتقي فيك أنت ومحمد، أتنعم معكم بنعيم لا يفنى بجنات الفردوس، الله يسهل عليكم

ادعوا لنا بالصبر والثبات وادعوا لوالدي وأخي بالفردوس الأعلى، ضحِكت لكم الجنة يا بابا، إلى رحمة الله