أصوات من غزة

كتبت إسراء سامي على حسابها الشخصي على موقع فيسبوك:

الحمد لله رح أكمل ما بدأته قبل الحرب
انتظرت كتير وبلهفة، إنه الجامعة تلاقي حل للتدريب الميداني لأقدر أتخرج، وأخيرًا لقوا الحل لقسمنا.

ككل بداية حاسة بحماس ممزوج بالخوف، بس بهالوضع الخوف مُضاعف، ورح أكون لحالي بدون مرشد أو موجه، عليّ مهمات كتير كتيرة لازم أنجزها وأوثقها، في مركز من مراكز النزوح مع ناس الحرب أنهكتها، ودوري إني أكون ملاذ ومُرشدة لأساعدهم. يارب اجعلني أكون قدها.

كلمات مرشدتي في تدريبي الأول المس وسام "استشهدت الله يرحمها" ما بتفارقني "أنتِ جدعة بركن عليكِ، ما بينخاف عليكِ"، يا إلهي شو أثرها عظيم جواتي، وشو محتاجة لطيبتها وحنانها ونصائحها اليوم..

يا إلهي كيف انقلب حالنا! يا الله قديش قلبي مفطور..

يا حبيبي يارب ارزقني التوفيق والسداد، وانفعني بما علمتني وعلمني ما ينفعني وزدني علمًا وانفع بي، يارب العلامات يلي تسر قلبي وخاطري، يارب ارزقني كمال النهايات، اللهم آمين