أصوات من غزة

كتبت بيسان عودة عبر صفحتها الشخصية على موقع فيسبوك، تعليقًا على الصورة:

مرحبا، اسمي بيسان.. أنا من غزة ولسا عايشة.
يشهد الله عليّ إنني مليانة حياة، وأنني بحب حياتي، بحب بلدي وبحب أهلي وأصحابي، طول عمري بحلم أساعد الناس وأغيِّر العالم وأوقف للحق وصوتي دايمًا عالي.
صحيت على حياتي لقيت سمائي مكسرة، ولقيت انني من شعب مقهور، يُقتل كل يوم الصبح عالريق، ولقيت الأخبار العاجلة ما بتنطفي من دارنا من لما كان عمري سنة.
أنا بيسان، لسا عايشة بس ما عندي أي ذنب يستدعي إنه العالم يعاقبني، وينبذني ويبعت كل الأسلحة الثقيلة ليزلزل الأرض من تحتي ويدفنني فيها حيّة، بدون خجل من كل هالجرائم وبدون خوف من معاقبة حد، لأنهم هو اللي بيملكوا القانون والقوة.
أنا بيسان لسا عايشة، واليوم كُنت أركض في الشارع لمدة ربع ساعة متواصلة عشان أسبق الطيار اللي جاي يقتلني وأصل الملجأ.. (المستشفى)، لأنه ما بعرف من وين جاياني القوة بس كان عندي تصوير وطلعت عشان أوصل صوتنا للعالم.
أنا بيسان لسا عايشة ومش متأكدة إذا راح أضل عايشة بعد هيك، ولكن لو مُت أنا مش مسامحة العالم، ودمي ودماء شعبي في أكل وشرب العالم وعلى وجوههم وفي كوابيسهم، لو مُت فالعالم كله هو اللي ضغط عالزناد اللي قتلتي.