كتبت رجاء أكرم "رجاء حمدونة" على حسابها الشخصي على موقع فيسبوك:
لكل حد بيبعت يسألني كيف استشهد جوزي وولادي وتصاوبت انا وبنتي و شو سار
في تاريخ 6\6\2024 يوم الخميس قبل المغرب بشوي كنت قاعدة بخبز عالصاج وكانت أول مرة بحياتي
وأحمد ابني كان بيساعدني بالخشب
وجارتي رواء مقداد بترق باقي العجين والصغار بيلعبوا حوالينا مافي ولا أي شي
فجأة أجت الأباتشي سارت تقصف بشكل عنيف ع البيوت اللي بالعزبة في رفح قرب الحدود المصرية، أصابنا خوف ورعب مابعرف كيف مسكت كوم رمل وطفيت النار وأخذت باقي العجين رميته بالأرض وبسرعة دخلت الخيمة أنا وولادي وجارتي وولادها وكلنا انبطحنا عالأرض وزوجي وصاحبه بحاولوا يهدوا فينا
بعدها بشوى سكتت الطيارة وبلش القصف من الطراد البحري بشكل عنيف جدآ ، طلب زوجي من صاحبه محمد قاعود انه نجتمع انا وزوجته وأولادنا بخيمتي وهما يضلوا برة يشوفوا الوضع
قعدوا عنا شوى وبعد ساعة قرروا يرجعوا ع خيمتهم اللي مابتبعد عنا سوى اربع أمتار ، وللعلم تحسبآ لأي دخول لليهود جوزي الله يرحمه زرع بالأرض عمود ارتفاعه تلاتة أمتار تقريبآ وعليه راية بيضا حتى يعرف الجميع انه احنا مدنيين
المهم أجا عبود ابن جارتي "خالتو أم حسن بدي صاج نتعشا " حكتلوا خذ ياحبيبي
أنا هان سألت أول واحد من ولادي أحمد شو بدك تاكل زعتر ولا جبنة قال زعتر مع جبنة ، الا محمد حبيب روحي بقولي لاااااا أنا يما بديش أكل بخاف تشتغل معدتي وأسير بدي افوت الحمام خلص الصبح بأكل، سار أحمد يقول وانا كمان خلص بديش بناكل سوا الصبح
ناموا الأولاد بخوفهم وجوعهم
طبعآ بهذه اللحظة ماكان في مجال حد يتحرك ولا يطلع
الساعة تقريبآ ١٠ المسا قصف من كل فج وميل
دبابات طيران طراد بحري ،
جوزي بيراقب من باب الخيمة القصف كله ع البيوت ومسجد الرحمة اللي بالعزبة أو القرية السويدية متل مابيحكوا عنها ، الأولاد بيتقلبوا من الخوف أنا برجف قلبي ح يوقف سرت اتشاهد أنا وجوزي ويضل يقولي ما تخافي والله مايضرونا بأمر الله بس بدهم يقصفوا البيوت
الوضع بيزيد للأسوأ شباك الخيمة مفتوح شايفين كل شي واحنا ولاحركة ولااضاءة ولاصوت لدرجة اللي بدو يقضي حاجته من الأولاد يفن في السلة
الساعة أربعة ونص تقريبآ شفنا الدبابات وضوء أصفر قوي بحكي لجوزي والله دبابات كتير الا طلع الضو الأصفر جرافة كبيرة بعد ماقصفوا البيوت والناس فيها ساروا يجرفوهم، محمد احمد صاحيين
سوسو بحضني ابراهيم بحضن أبوه
أجا محمد ع الجهة اللي انا متمددة فيها وأحمد لحقه يماا بدنا ننام عندك
قولت لمحمد انت روح في ظهر أبوك وانت ياأحمد في ظهري سألت أحمد خايف ياعمري قال لأ، بس لما قرب مني ولصق فيا حسيت كأنه كهربا مسكتني من كتر ما كان يرجف حبيبي
ضلينا كلنا نايمين وجوهنا بالأرض
الصوت قوي جدآ انا خايفة مش متحملة ضغطي بالسما قلبي وقف جسمي مكسر كله خوف ، سرت أحكيلهم وعد أول مايطلع النهار الا غير نترك المنطقة بما انهم وصلوا
الحدث الأليم عالساعة خمسة ونص الفجر قامت جارتي رواء ع الحمام ومعها ابنها عبود عمره ١١ سنة وحاملة راية بيضا بايدها ، قضوا حاجتهم ورجعت ع خيمتها
مالحقت توصل الخيمة الا دبابتين سريعات جدآ جايين علينا وبيطخوا جااااامد أول شي سمعت رواء بتقول "محمد محمد " كان هو أول واحد يستشهد وسار اولادها ينادوا يابا يابا بعدها سكت صوتهم وزاد صوت الرصاص ، احنا تصاوبنا كلنا
أحمد. آخخخ يمااا
أكرم آه ويتشاهد ويكبر ، أنا سرت اتوجع واتشاهد من شدة الألم لما دخلت رصاصة برجلي ، سوسو ياقلبي عليها سارت تتوجع وخايفة تطلع صوتها
محمد ياعمري ماسمعت صوته نهائيآ كان أقرب واحد ع باب الخيمة راسه انفتح نصفين
الآن كلنا مصابيين جوزي بينزف وقاعد يتشاهد و أنا بطلع من شباك الخيمة وانا نايمة ع بطني ومصابة الا دبابة دخلت ع خيمة جيرانا عائلة قاعود ودعستهم
سرت اقول أكرم أكرم الدبابة جاية علينا والله جاية راح جوزي وهو مصاب وبينزف رمى حاله فوق ولادي التلاتة ع اساس يحميهم ياروحي
أما أنا مابعرف كيف قومت وحملت سوسو من كتفها والجوال فاتح خط مع سلفي وحاولت اهرب من الباب الغربي للخيمة بس مالحقت اهرب أجت الدبابة سريعة دعست جوزي وولادي وبعدها عليا
قسمآ بالله رفعت بنتي بأيدي الشمال ورفعتلهم ايدي اليمين وسرت اقولهم لااااااا لأ لأ عالفاضي دعستني وبنتي بحضني بس هان كانت رحمة ربنا كبيرة انا غطست برمل ناعم جدآ وكثيف انا وبنتي دعست ع رجليا لآخر ظهري ولفت عني ،
أنا خلص شوفت الموت أكيد أنا في نزاع سرت أتشاهد وأقول ان للموت سكرات
بطلع في بنتي كلها بالرمل مبين وجهها بس تمها أنفها عيونها كله رمل
لفيت وجهي عالخيمة اللي كلها واقعة فوقهم لمحت أحمد غرقان بدمه بس شفت ظهره والله كان في نفس بس ماقدرت أعمل شي ولا حتى أنادي عليه
ع جنب الخيمة جوزي مع حلاة الروح بيتقلب ماشفت رجليه شفته كله بينزف وأيده مبتورة ، الا هو بينادي عليا رجاء حبيبتي سامحيني " مسامحاني؟" قولتله
حبيبي يا اكرم مسمحاك والله
أنا بطلع في بنتي عيونها بيقلبوا الا أنا بنادي بقول لجوزي أكرم سوسو بتنازع سوسو بتطلع بالروح يااأكرم سار يحكيلها حبيبتي ياسوسو حبيبتي يابابا ، سرت احكي
أكرم اليوم الجمعة الأول من ذي الحجة اليوم محمد وأحمد انولدوا
سار يقول الحمدلله الحمدلله
فجأة ابراهيم بيطلع من بين اخواته بيرجف بيبكي كله دم
انا فيك اشي ياحبيبي ابراهيم فيك حاجة قال لا خايف قولتله روح بسرعة ف حضن بابا سار يقول لا بدي اجي عندك انتي وسوسو طبعآ انا بعيدة يمكن مترين تلات بس
أجا برهوم ورا ظهري وانا لسة بالرمل ومالحقت أتحرك الا صوت الدبابة بترج الأرض وراسي سار يرج من قربها
سرت احكي لابني أعمل حالك ميت ياحبيبي أعمل حالك ميت سار يبكي ويقول ليش بدها تدعسنا كمان مرة هي جاية علينا ؟! !
قولتله اه بس رد عليا ، طبعآ انا مغمضة عيوني وخايفة مش مسترجية افتح واشوف الدبابة كمان مرة
وفعلا أجت سريعة وبعدها طلعت عالاسفلت ولفت
جوزي بيتشاهد وبنازع حبيبي وبقول الله أكبر الله أكبر..... الا ابني وهو متخبي ورايا بقول حي على الصلاة حي على الفلاح ، بفكر أبوه بأذن
مابعرف قديش المدة اللي قعدنا ننزف فيها!!
فجأة الا في ست ماشية معها أولادها وحاملة راية بيضا ناديت عليها قولتلها أمانة تاخذي ابني فش في ولا شي مش مصاب
قال وين أخذه قولتلها بيعرف دار سيده بمواصي خانيونس اي حد ممكن يوصله
قولت لإبراهيم روح ياحبيبي روح مع خالتو واحكيلهم وين دار سيدك قاعدين
راح يجري وهو بيبكي حافي غرقان بدم أبوه واخواته
الا جوزي ياحرام بقولي رجاء احكيلها تبعت النا إسعاف ، سارت الست تقولي والله يختي ولا اسعاف ولا صحافة والدبابات ورانا
راحت الست وبعدت عني مايقارب عشرين متر ، لفيت وجهي ع جوزي ناديت عليه ما رد شكله وقتها استشهد مابعرف
أنا سرت أفقد في بنتي لقيت اصابتها في رجلها اليمين متفجرة
سألتها سوسو وين بدك تروحي ردي عليا.؟
قالت ع خالتو هبة
انا هان قررت انقذ حالي وبنتي عشان خاطر ابني اللي ضل لحالو وبنتي اللي فكرت فيها ممكن انا اضل انزف واستشهد وتضل بنتي عايشة يقوموا ياخذوها اليهود يعملوا فيها شي
جمعت كل قوتي اللي ربنا أعطاني اياها
وعملت حركت السجود ع ايديا ورجليا وقولت لسوسو يلا يا عمري اطلعي ع ظهري حطي ايدك ع رقبتي اخنقيني عشان نروح ع خالتو وفعلآ حطيت بنتي ع ظهري وبلشت زحف وأنا بنزف ورجلي بتنزل قطع لحم ودم وبتاكل رمل وأوساخ بس معلش كل همي انقذ نفسي وبنتي فش ولا مخلوق الا اليهود
بعد ما زحفت مايقارب ٦٠٠ متر بلشت الأرض تقسى وقربت أوصل اليابس كان كل الزحف ع الرمل ، رميت حالي وسرت اصرخ بعالي الصوت ياااااااااااااااااااارب القوة من عندك يارب عشان خاطر ابراهيم وسوسو يارب
صوتي وصل سابع سما بس ما حد سمعني من الناس
تذكرت انو اليوم الجمعة بدأت أقرأ سورة الكهف
بنتي بدها مية ماما عطشانة قولتها وانا والله بدي مية وسرت أحاول اطلع الرمل من تمها وعيونها وانفها
كل ما أتحرك القناص يطخ اشي ع غرف الصيادين اللي ع شمالي واشي جمبي بالرمل وهان تصاوبت بأيدي عالاغلب
الوجع الكبير انه كان الذبان يفوت بجرحي و اكل وجه بنتي سرت احاول اغطي وجهها باسدال الصلاة اللي انا لابساه
وانا احرك رجليا انو الذبان يطلع أبدآ متجمع عالدم كان في طلق متفجر برجلي اليمين من تحت
استسلمت وسرت اطلع بالسما واتشاهد سحبت بنتي بحضني أكتر وكل مااتحرك يطخوا علينا
رفعت راسي في حد هاااان حد سامعني
الا راجل متداري جنب حيط بقولي مين ؟!!
قولتله ساعدني انا مصابة حكالي تعالي لتحت شوى مابقدر اوصلك لانه فعليآ كان القناص والكواد كابتر معبية المكان
قولتله بنتي معي مصابة والدبابة دعستنا مش قادرة
ورجعت نمت مابعرف فقدت الوعي وقتها ولا لأ
فجأة رحمات ربي وصلتني عن طريق ست طالعة هي وأولادها كاينة محتمية بجدار الحدود المصرية مع جوزها وولادها ولانه معها جوازات مصرية طلعوها بس اعتقلوا جوزها
سرت انادي عليها أمانة تساعديني خذي بنتي ع أقرب مستشفى اصابتها مش خطيرة كتير
سار ابنها الصغير يعيط ويقولها لأ يما يلا امشي الدبابة ورانا
كانت حاملة اشي ع كتفها اظن لحاف قولتلها أمانة ارمي العفش والله كله بتعوض اعملي شي مع الله خذيها أمانة خذيها
الحمدلله ربنا حنن قلبها قالت والله لاخذها وهذه أمانة معي
الحمدلله بنتي مع الست بس بردوا انا لازم اعيش عشان ولادي فش الهم حد
سرت أفكر وأقول بدي اعمل متل الأبطال بالافلام بكونوا مصابين وبينقذوا حالهم واللي معهم
فجأة سمعت صوت رفعت راسي على بُعد ١٠٠ متر تقريبآ ابنها للست اللي أخذت بنتي عمره يمكن ١٥ سنة بنادي بصوت عالي بقولك الزلمة اللي بدو يساعدك انزلي ناحية البحر اله ساعة بستنا فيكي
رحمتك يارب أنا مش قادرة وريحة دم كتير رفعت ايدي الأرض غرقانة دم ورجلي بتنزف الآن الشي صعب جدا لازم أقطع الأسفلت وطبعآ كله حجار وشظايا وساخن جدآ وغير هيك مش قادرة ازحف بنفس الطريقة عالايد اليمين والشمال
ف رحت نزلت البنطلون ع رجلي وغطيت الجرح ولقيت حبل ربطت رجلي
وسرت احاول ازحف ع رجل وايد الجهة الشمال
زحفت ع أوساخ ومية وحجار عذاااااب لحد ما قدرت اوصل حفة أول حيط من غرف الصيادين اجت بدها توقع لأنها مقصوفة استجمعت قوتي حاولت أسند نفسي ماقدرت بطلع فوق راسي شوفت كواد كابتر سرت أشاور الهم زي الهبلة يمكن يحنوا عليا عالفااااضي
كملت زحف لما سرت ع عتبة بلاط ووجهي عالبحر لقيت الطراد في وجهي ورب الكعبة سرت أشاور بدون وعي يمكن يسعفني لكن مااعطوني اي اهتمام
فش شوى الا اتنين شباب بيحكوا يختي حاولي قربي شوى عشان في قناص قولتلهم مش قادرة خلص
كانوا بعيد عني يمكن ٣٠ متر وقريب منهم قنية مية قولتلهم بدي أشرب شربووووني
اجوا الشباب بجانب الحيطان لحد ماوصلوني وحملوني لعند اخر غرفة قريب منطقة العلم لقوا حرام حطوني عليه وساروا يسحبوا فيا عالأرض طبعآ كل وجع الدنيا معي الآن مش متحملة تحتي حجار والشمس ف وجهي ياااااالله قديش تعبت لحد مالقوا سيارة وبعدها اسعاف حطوني بالاسعاف وانا بناجي ربي أعطوني اي شي بديش احس بالوجع ظهري رجليا دعستني الدبابة امانة
المسعف تحملي شوى يختي والله مامعنا شي
رفعت راسي وفتحت عنيا أخويا محمد فوق راسي
يمااا انت محمد اخويا انت محمد
اه يختي متخافيش طيب ابراهيم شفته قال اه الصليب وصلوا عنا وهو اللي حكالنا كل شي
طيب سوسو أمانة ماشفتها
والله يختي لقيت شب متصاوب رحت أسعفه لقيت بنتك بحضنه وفاقدة الوعي اخذتها عالمستشفى وهي الآن بالعمليات
الحمدلله الحمدلله يارب
اخذوني ع مستشفى الصليب الأحمر الميداني برفح بدهم يحملوني قولتلهم أمانة بشويش الدبابة دعستني
الدكاترة فكروني بهلوس
قولتلهم يشهد ربي عليا الدبابة دعستني انا وبنتي
مابعرف بعدها كيف دخلوني عمليات وشو سار
بس صحيت ووعيت لقيت أهلي كلهم عندي وانا ع سرير وبنتي جنبي ع سرير تاني
طيب أمانة جوزي وولادي وينهم حد جابهم ؟؟ !!!
٤٢ يوم ما حد بيعرف شو سار بالجثث لأنو الجيش رافض أي تنسيق ومانع حد يفوت هناك
استشهد جوزي وولادي محمد وأحمد مهجة قلبي ونور عيني
استشهدت جارتي رواء مقداد وزوجها محمد قاعود وابنها عبود وبنتها الملكة أيلول وابنهم اللي نولد بالحرب وسام عمره سبع شهور
قعدت بالمستشفى شهر مابقدر أحرك حالي عملت خمس عمليات كانت رجلي معرضة للبتر لكن رحمة الله فوق كل شي
إصابتي طلق متفجر برجلي اليمين وأربع كسور وتهشم بالعظم مع إصابة بأيدي اليمين
وبعض الشظايا وردود في ظهري وباقي جسمي مع تمزق بالاوتار
بنتي طلق متفجر بالرجل اليمين وكسر
مع كسر وخلع برجلها الشمال بالإضافة لردود وكدمات بظهرها
والحمدلله على كل حال
نفسي الاقي زوجي وولادي وأكرمهم وندفنهم
أمنيتي أشوف بنتي بتلعب وبتمشي زي زمان وانا اقدر أقف ع رجليا
وربنا يحمي ابني ابراهيم ويعيني ع تربيتهم ياااارب
حسبي الله ونعم الوكيل على اللي حرمني من ولادي وجوزي
19\7\2024
