أصوات من غزة

كتبت نسمة محمد برهوم على حسابها الشخصي على موقع فيسبوك:

كل سنة كنت أستنى الشتا وريحة المطر

اليوم الشتا بالنسبة الي خوف وتشرد

دخلوا علينا اليهود السنة الماضية في الشتا

ودخلوا ع الشفا المرة الثانية فجأة بعز الشتا والمطر

كان بيني وبين رصاصة قناص مليمترات كمان في الشتا

عشت أصعب شعور ممكن أم تعيشه كمان في الشتا

أولادي في الشتا الماضي كانوا سقعانين كثير وأنا في عز المطر والبرد ما كان معي غير بلوزة وحدة ألبسها عشان تدفيني

انقطع الاتصال مع زوجي كمان في الشتا

أهلي ضلهم أكثر من أسبوعين ما بيعرفوا مصيرنا، عايشين ولا ميتين كمان في الشتا

التجويع كان في أشد مراحله في الشتا

وكثير تفاصيل ثانية بشعة وأيام مليانة وجع عشناها في الشتا

أنا بحاول إني أضل أحب الشتا ويا رب تخلص الحرب وأرجع أنبسط في الشتا مع أهلي وزوجي وأولادي وكل حبايبنا

نرجع نعيش أجواء شتا غزة اللي ما في منها، الكورنيش وبياعين الذرة والمشاريب الساخنة، الكستنا والعوامة، طلعات البحر في الليل اللي كلها حب

يا رب توقف الحرب وترجع تتعمر بلدنا ونرجع نعيش فيها بكل ظروفها ونحن راضيين.