أصوات من غزة

كتب جميل جمال على حسابه الشخصي على موقع فيسبوك:

حصل معي موقف اليوم غريب شوي

أنا شغال بمحل ملابس "بالة"

المهم فاتح من الصبح ولحد الظهر ما حدا قلي بكم ولا بقديش وقاعد طفران حالي

المهم اجا عندي واحد

وقلي مرحبا

حكيت له آهلين ي عم تفضل

سرحت ثواني وقلت بعقلي بس فرجت هسا بنستفتح وبتفك نحاسة اليوم

لهوا بقلي ممكن كلمتين وبخجل

حكيت له تفضل

قلي نزحت أنا وأسرتي من جباليا وطلعنا بطولنا.. استرني

حكيت له تكملش وبدون ما أحسسه بنظرة او بكلمة إنه محتاج

تفضل داخل المحل ونقي اللي بدك اياه

وبدون ما أرجع لإدارة المحل

وقفت معاه باختيار الأواعي وشفت كمية السعادة ع وجهه لما خلص وراح.

اقسم بالله ي جماعة لم يمضي نص ساعة

وإلا المحل صار يعج بالناس

وما في حدا منهم بسأل.. الكل كان يدخل يشتري

وكأنه المكان تحول لوقفة عيد من كثر الناس الي تدخل وتطلع.

فعلا فعل الخير بدون انتظار المقابل هو أحد أعظم الأعمال الإنسانية.