كتبت دارين أبو جامع على حسابها الشخصي على موقع فيسبوك:

انا خطبت ببداية الحرب وكان قلبي مليان أمل قلت يومين وبترجع الدنيا لحالها وبفرح وأعيش حياتي اللي حلمت فيها اتفقنا على كلشي رسمنا مستقبلنا مع بعض بس اليومين راحت وصاروا سنتين والعمر بيمشي حتى التنسيق اللي قدمت عليه عشان أسافر قفل المعبر قبل ما يطلع اسمي وصرت محبوسة بين جدران ما بتشيل أحلامي ولا تسامحها

‎حياتي كلها وقفت فرحتي راحت ما حسيت فيها ولا عشتها مثل باقي البنات شغلي اللي كان كل حياتي تبخر والعمر بيجري وأنا مش قادرة ألاحقه كل يوم بعيشه وأنا بعيدة عنه مش لاقي طريق يجيني ولا أنا قادرة أوصله كل واحد فينا حابس تنهيدته مستنيين شي مش معروف متى بيصير بطلنا نحلم بطلنا نرتب للمستقبل صرنا نحسب الأيام ع أمل ما يخلصش والله قلبي عليه وقلبه علي وكل يوم بننام ع فرقة وكأنو العمر حكم علينا نضل نحب بعض من بعيد بنحاول نواسي بعض بس الجرح أكبر من الكلمات والخناق بينا صار أكتر من الفرح اللي كان ممكن نعيشه

‎صرت ضايعة مش عارفة وين رايحة فيا الدنيا ولا شو مخبيلي القدر هل حتجمعنا الأيام أو حتنهي حياتنا هالحرب اللعينة؟

هل رح يشوف قلبي السلام ولو للحظة؟ أنا اللي كنت بحب الحياة وحلمت أبني بيت وأحقق أمالي مع اللي حبيته هل كل هالأحلام راح تنمحي وسط الدخان والدمع؟

بتمنا اليوم اللي نلتقي فيه ببيت واحد مش بحلم مكسور