أصوات من غزة

كتب يحيى الشولي على صفحته الشخصية على موقع فيسبوك:

الغزاوي مش بس جعان وبيعاني من الضعف الجسدي.. الغزاوي جعان وبيعيش نمط حياة الرياضيين اللي بياكلوا خمس وجبات في اليوم بقدروش عليه.

اقل واحد بيصحى مش نايم ساعتين من أصوات القصف وبيمشي ٢٠ كيلو في اليوم تحت الشمس لتوفير الحطب والمي وغيرها من الاحتياجات اليومية.. واذا كان عنده شغل قصته صعبة ومعقدة لأنه الوصول لمكان العمل فقط بيعادل خمس أيام عمل في أي مكان تاني.. من مواصلات مش موجودة لشوارع مدمرة وشوارع تانية غرقانة بالوسخ وتفاصيل بيعجز عنها اللسان.

وكل هاد المشاوير تحت الشمس في عز الصيف، وطبعا اذا بعد هاد كله لسة عنده شوية صحة.. مطلوب منه يروح يسهر على الحدود يحارب زي الزومبي على كيس طحين بين الموت والقتل العشوائي، وعالاغلب برجع بدون طحين.

برجع ليش؟ عشان مينامش كويس ويتحمل الجوع طول النهار والليل، ويصحى الصبح يبدأ تفاصيل هاد اليوم المقرف.. ويدفع عمولات نص مصاريه.. والنص التاني يترجى البياعين يقبلوه عشان مش عاجبهم شكل المصاري وهما أساسا ببيعوا الاشي بعشرين وثلاثين ضعف سعره.

هاد كله الغزاوي الجعان مجبور يمر بيه كل يوم.. طبعا لو كان محظوظ وطلع لسة ضايل بحياته كمان يوم.. مع اني أشك في موضوع الحظ هاد.