أصوات من غزة

كتب أحمد أبو شرخ على حسابه الشخصي على موقع فيسبوك:

الساعة 3 الفجر الليلة لم دخلت كميات الطحين، صحيت على صوت الناس على هوا إنه خيمتنا ع البحر، طلعت أقعد على الباب أتفرج على الناس وكل واحد حامل كيس طحين على ظهرو ومبسوط، وبتفرج على نفسي بنفس الوقت عاجز ومش قادر أروح ولا أمشي عشان أحمل زيهم وأجيب طحين لأهلي.، فجأة وقف عندي شب طلب مكالمة جوال وقلتله حاضر ويعطيك العافية والشب مهلوك ومش قادر يمشي على حيله وجبتلو قزازة مياه يشرب، فجأة الشب بقلي هات كيس كبير أو طنجرة كبيرة أستغربت وأنصدمت من هالطلب وقلتله حاضر جبت كيس كبير والشب فتح كيس الطحين إللي معاه وحط لا يقل عن 6 كيلو طحين ولم قام أعطاني الكيس وقلي هذا نصيبك!!

بقلو يسلم أيدك بس بديش يعني وخدمتك مش عشان تعطيني طحين!

الشب رفض يرجع الكيس ومشى وقلي صحتين وعافية!

الشب هذا حدالله ما بعرفوا ولا حتى بتذكر شكلو لإنه كانت عتمة وراح

الشب يمكن ما بعرف قديش هالطحين أنقذني، بس الله بيعرف، والله ما بيضيع أجر أهل الخير.

شكراً من القلب، ولك مثل ما تمنيت لنا وأكثر. 

في بالدنيا أمل لسه.