أصوات من غزة

كتبت رفيف عزيز على حسابها الشخصي على موقع فيسبوك:

اشتريت بصلتين خربانين ب ٤٠ شيكل (١٢ دولار).. اه والله

وقلتله خربان بصلك.. قالي هي الموجود

قلتله طيب رخصه عالأقل.. قالي بيزبطش

مشيت وأنا مقهورة

وبالليل حلمت إني في مزرعة بصل زي المتحف هيك.. مليانة أشكال وألوان بصل غريبة عجيبة وجميلة جدا ومحطوطة ب فاترينات.. وأنا هيك مبهورة وبتفرج على الأقسام والأجزاء في حديقة البصل العجيبة.. وقلت الحمدلله.. عوضك يا رب

وفي جزء صغير هيك للثوم في نص المتحف.. وفرحت كتيييير

صحيت بقول ياربي كان نفسي أزور متحف آثار أو ديناصورات.. أزور حديقة الورد الطائفي أو أي حديقة عجيبة في العالم.. مش بصل

عالعموم يمكن اللي برة غزة يستغرب

احنا الآن بنطبخ بدون بصل.. معدوم ولو موجود الكيلو ب ٤٠٠ شيكل (أكثر من ١٠٠ دولار)

الثوم غير موجود ولو انوجد بقايا ما تم تخزينه فيتم بيع الرأس ب ١٠٠ شيكل (٣٠ دولار).. والضرس الواحد ١٥ شيكل

البهارات والماجي تضخم سعرهم بشكل جنوني بحيث ملعقة واحدة من الفلفل الأسمر ب ١٠ شيكل..

الصلصة ملعقتين صغار ب ١٠ شيكل

فصرنا نطبخ فقط بماء وملح

ثوابت وأساسيات الأكل عنا تغيرت مفاهيمها غصب عنا.. المجدرة بدنا نمشيها بدون بصل.. الملوخية بدها تمشي بدون ثوم حتى لو صار طعمها طبيخ أعشاب.. العدس بيمشي بدون بصل وكمون.. الطبايخ الحمرة بتمشي بدون صلصة.. احنا بنخوض معركة بقاء صعبة بتفاصيل يمكن قبالكم تبين تافهة بس هي بتوجعنا.. بيوجعني أطبخ كيلو عدس ب ٥٠ شيكل وياريته زاكي ولا عليه بصل وكمون وبهارات.. يعني مكلفني اشي وشويات ولو بدي اطبخه ع أصوله بدي ٢٥٠ شيكل ( ٧٢ دولار)..

والتجار وصلوا درجة غريبة من الوقاحة.. بيعرض الخضار خربانة وبسعر غالي برضو

يخرب عنده ولا يبيعه برخيص.. وهادي صورة بتنجان خربان معروض للبيع آخر الجلاء.. وأخيرا أشهدك يا رب إني راضية ثقة وإيمانا بعوضك وعدلك