أصوات من غزة

فيديو ساخر للفنان هشام عدنان يخاطب من خلاله أهل غزة، ويسألهم:

مزهقتوش/ مملتوش من مناشدة العرب؟!

نص محتوى الفيديو

رسالة لكل سكان قطاع غزة 

أنا إلي سنة ونص عايش اللي انتوا عايشينه وشايف اللي انتوا شايفينه وعايش كل تفاصيل الحياة في غزة 

الكوا سنة ونص بتناشدوا العرب وبتقولوا لهم: انشروا، وبتقولوا لهم: قاطعوا، وبتقولوا لهم: بدنا مساعدات

مزهقتوش مملتوش؟! 

أزعجتوا العرب، وأزعجتوا أم الكوكب..

طلبتوا مساعدات؟

دخلوا لكم معلبات، ودخلوا لكم فاصوليا، ودخلوا لكم بازلاء، ودخلوا لكم مياه، ودخلوا لكم غاز، ودخلوا لكم سولار وبنزين 

"المساعدات هادي كانت زمان، اليوم محدش قادر يدخل قنية مياه"

لا ما هو هدا كان يعني أيام ما كانوا قادرين، هلقيت مش قادرين، كان دخلوا، ونزلوا لكم إسقاطات جوية..

"يا عم الإسقاطات الجوية وقعت على الناس قتلتها يا راجل" 

لا هيك كتير يعني، ما إنتوا شوية لياقة يا أهل غزة، شوية مراوغة.. مراوغة، بدنا بس شوية لياقة..

مش عارفين تراوغوا دروب نازل عليكم من السما؟! بتروحوا تموتوا كمان إنتوا!!

ودخلوا لكم كمان أكفان.. 

"يا عمي الأكفان مكفوش الناس يا عمي" 

لا ما هو إذا انتوا يعني.. إذا احنا.. إذا هم العرب دخلوا لكم عشر آلاف كفن، وإنتوا روحتوا موتوا خمسين ألف! 

هذا سوء استخدام منكم يعني.. موتوا على قد أكفانكم!  

بعدين إنتوا مش محتاجين أكفان، الشهيد لا يكفن ولا يغسل..

مدلعين إنتوا عن جد!

يعني مش ناقص غير تقولوا لهم: اقطعوا العلاقات مع ولاد اللي ما يتسموا!

شوية وتقولوا لهم حاصروهم ولا تعالوا..