أصوات من غزة

كتبت إسراء سامي على حسابها الشخصي على موقع فيسبوك:

اليوم الصبح هددوا بيت جيرانا، وبنفس الوقت ضربوا صاروخ تحذيري على بيت قريب منا..

كنا بنستنا، بنضحك، بحكيلهم تعبت وأنا بستنى يخلصونا، آلاء بتقول: نامي!

تذكرت لما في ديسمبر 2023 قصفوا جيرانا وأنا نايمة، كيف قمت أصرخ وأتشهد، كيف ضليت لكم شهر على أي صوت قصف مهما كان بعيد أقوم من النوم مفزوعة وأمسك حجابي وأجري..

وأنا بتذكر فجأة... قصفوا البيت، صوت صراخنا لهلأ براسي، البيت صار ضبابي من الدخان وريحة البارود، الشبابيك الباقية طارت وتكسرت، الردم نزل على سطح وممر البيت..

لينا أختي كانت برا، رنينا على المركز يلي بتدرب فيه قالوا روحت قبل الضربة، نفس طريق البيت يلي انقصف... وين لينا؟ عياط عياط عياط ورعب من إنه يكون صرلها مكروه... وقبل ما يطلعوا يدوروا عليها أجت منهارة، نجت من الموت...

واحنا نزلنا على الطابق الأرضي، أخدنا نفس، شربنا مي، لسا بنحاول نستوعب ونحكي ونلطف جو...

فجأة، قصفوا البيت التانية، مرة تانية انعاد نفس المشهد، صراخ مضاعف...

لمتى رح يضل المشهد يتكرر؟!

حاسة راسي رح ينفجر من كمية الضغط، جسمي كله واجعني..

ليش كل هاد؟ عشان ولا اشي..

حسبنا الله ونعم الوكيل..