استشهدوا كلهم!
الكاتب
حنين مقداد
المكان
النصيرات
تاريخ الحدث
2024-03-03
اسم الباحث
لقاء السعدي
كتبت حنين مقداد على حسابها الشخصي على موقع فيسبوك:
حنين سامعاني؟
آآه
احكيلي مين عندك بالغرفة
عندي إبراهيم وزينة استشهدوا
طيب احنا بدنا نحفر ونطلعك اصبري
البنت وضعها صعب
المكان قبر
السقف حيهبط
كسر من جهتك واسحب لبرة.
حاول تهوي بالكرتونة عالبنت عشان النفس
بتتنفسي يا عم؟
تشاهدي يا عم
هادا زوجك؟
آه
استشهد
إنا لله وإنا إليه راجعون.
في بيبي بالسرير
آه زينة بنتي استشهدت
لا فيها نفس
لا انخقنت عيطت شوي وهي مخنوقة واستشهدت، إنا لله وإنا إليه راجعون
انا آسف عالخبطة هاي ايدك؟ فكرتها ايد حدا تاني.
أنا شكلي انشليت
لا يا عم هادا خدلان ما تخافي
السقف بهبط
زاد الضغط عليكي؟
آه
سامحينا هينا بنحاول
خلص سيبوني صعب تطلعوني
لا يا عم والله غير أطلعك
" لا إله إلا أنت سبحانك إني كنت من الظالمين"
هات الشيالة
الله أكبر
البنت عايشة
مين هادي؟
حنين يا حج
حبيبتي يابا.
أنا قريبها بدي أطلع معها بالاسعاف.
أنا بعرف مكانهم كلهم أمانة تطلعوهم
احكيلي أماكنهم بالزبط
إبراهيم رجله معلقة طلعوه أمانة يمكن فيه نفس.
باسل في حضنه عمر وندى في الغرفة الغربية
إمي عند باب الشقة
سارة رايحة عالمطبخ.
..
استشهدوا كلهم
كلهم؟ ولا حدا ضل؟
كلهم يا خالي قولي الحمدلله
الحمدلله
تعالي عشان تودعي أولادك وأخوك
محلاها زينة مافيها اشي
ندى متصاوبة براسها يا عمري
عمور شكله مخنوق؟ يارب يكون عطول استشهد مش زي زينة
ليش عمور هيك صغران؟ شكله جسمه مضغوط؟
حبايبي كتير بردانين
وين إبراهيم؟
لسه ما جابوه
أنا بعرف إنه رجله معلقة
مين هدول؟
بنات خالتك
وين خالتي؟
في شهداء الأقصى مش هان
وين إمي وسارة؟
لسه بحاولوا يطلعوهم
جابوا إبراهيم تعالي عشان تودعيه
ودعته
وودعت أولادي وباسل
ورجعت ودعت إبراهيم
ورجعت ودعت أولادي وأخوي.
خلص يا حبيبتي بدنا نصلي عليهم وندفنهم.
تصلوا عليهم؟
ادفنوهم في حضن إبراهيم عشان ما يخافوا.
دفناهم الحمدلله
ما أسرعهم وما أخفهم مشتاقين للقاء الله، مشتاقين للجنة.
هي سبحة إبراهيم كانت بجيبته وهادا مصحفه كان بإيده.
حبيبي الله يتقبله
وإمي وسارة؟
بكرة بنحاول
مش حنقدر
بس توقف الحرب بنحاول
مصعب شو بتعمل؟
بحفر عشان أطلع خالتي وسارة
وصلنا إمك يا حنين
هي إمك معك عالجوال عشان تودعيها
دفناها جنب عمر وندى وزينة
وصلنا سارة الحمدلله
هي سارة معك عالجوال عشان تودعيها
يا الله لقينا لسارة قبر جاهز والله هالبنت إلها كرامات
آه الحمدلله سارة من حفظة كتاب الله.
قبر لسارة؟
سارة استشهدت واندفنت؟
عمر وندى وزينة وإمي استشهدوا وجنب بعض
اندفنوا؟
إبراهيم وباسل استشهدوا؟ وجنب بعض اندفنوا؟
آه الحمدلله لحقوا أحمد
أحمد اشتاقلهم.
خالتي وبناتها وبراءة اندفنوا؟
آه الحمدلله
لحقوا ملاك ويوسف
حطينا شواهد عالقبور.
كله هاد حقيقة
مش حلم.
اللهم اؤجرني في مصيبتي واخلف لي خيرا منها.
مصدر المعلومات
الكلمات المفتاحية
مسح العائلات
مجازر
